|
Description:
|
|
Ils glatschers èn per murir – quai n’è betg pli ina prognosa, ma la realitad actuala. Speranza na datti en sasez nagina. Las redacturas Isabelle Jaeger e Bertilla Giossi han vulì savair, tge che quels fatgs signifitgan per il Grischun. Perquai han ellas visità quatter dals 444 glatschers grischuns: Sin il Vadret Pers sa regordan las guidas da muntogna Jachen Egler e Stefan Felix dal glatscher dad ina giada, sin il Vorab lavura Valentin Cathomas per preparar las pistas, sin il Vadret da Lischana dattan Ursula Hofer e Felix Keller tut, per ch’il glatscher muribund sappia er furnir en avegnir l’aua per la chamona – e la fin finala mussa il glaziolog Felix Keller sin il Morteratsch, tge visiuns che san daventar projects reals. |